生活隨筆

黎梗嗰兩個禮拜，真係忙到PK。

又要搞jpc Camp day，又要考試，又要做功課，又要返工，又要返學，又要食飯，又要去廁所，俾多十年我都唔夠用，

真係唔明，啲時間會撞埋晒一齊，真係好徬徨，

最慘仲係每個月人工唔夠洗，又基金、又保險，又分期，又卡數，又儲錢，又家用，俾多十萬我...都係咁洗

無論精神同物質，我都好似徹底被剝奪，

就連放工放學後，想同心愛既人一齊，加啲錢食碗加大碼既魯肉飯，滿足下自己，都要被halt停，再加幾句：「你無錢架喇，又要交學費、又去左旅行，呢餐我諗住食一百蚊咋。」

<<但係個餐成百五蚊架喎.....(我心諗)>>

真係o晒咀，但係諗深一層，佢都係為大家好，好彩有佢既幫忙，

唔知點解，同佢時間耐左，就愈發覺佢可愛既地方，對佢真係有無盡既感激，直到呢一刻，我都深信佢係我唔知幾多世前修來的福氣。

呢種福氣...同兄弟父母朋友不同，如果夏娃係阿當身體一節肋骨，我相信，佢就係我身上一大舊脂肪...無計，我就係有呢種感覺。

我知道人生旅途，生活或許會有波折，甚至有時會悲觀去諗，家人終有一天都會離我而去，最後面對既可能只有自己靈魂，但我相信，以往生活為我帶來既關係，所產生的情，都會一點一滴累積心中，哪怕自己孤身一人，都不會落寞，因為過去的幸福已佔據了我的永恒國度。

爸爸媽媽真的很可愛。

當他大聲哭起來，老豆就會頭也不回，走到他的身旁，一手將他抱入懷中，一邊咕嚕咕嚕地安慰著， 一邊輕輕地拍拍他的背部，示意他別要哭。

同時，媽媽便會一個箭步走到廚房，把奶樽、奶粉、熱水等等都預備好，小心翼翼地量度奶粉份量，測試水溫，把奶樽抹乾淨，務求要至臻完美，將這樽奶調較得比人奶還要有營養。

事實上，這樽奶的心機確實不讓人奶專美。

這幾個晚上，無論回家有多晚，經過他們的房間，他們總是睡眼惺忪，而手中還抱著他，不時報以微笑，我看在眼內，不清楚這是巧合、還是故意在我面前眩耀這份福氣。

雖然辛苦，我深信他們享受這份福氣。

罡佑，希望你長大了，會好好孝順爺爺麻麻，與我們一起好好的陪伴他們。

閰王要你三更死，不許留人到五分。

雖然成日都會遇到，但係每次落手做野既時候，同時心入面都唔有啲唔開心，

我唔知點樣形容呢種感覺，如果要試下講出黎，我諗係個心有少少痛痛地，然後隻眼有少少"醃醃地"，喉嚨不自覺咁有啲抽搐，再過一陣，呢啲感覺沉到心底，跌到好深好深....

無論係細至廿幾日大，老至七八十歲，抑或係身前壞事做盡，又或者係連眼都未識眨就過身既，佢地都係輕輕閉上雙眼，硬磞磞既訓係冰冷既鐵床，就係咁樣一直訓係度......

鐵床上，唔單止躺著冰冷既身軀，還盛有一大堆故事回憶，你唔會再記得佢有多乞人憎、有幾咁討厭，我見過好多人曾經挨係床邊，口中一邊數說往事，淚水一邊沾濕床邊既扶手。訓係度既人無法再靠扶手站起來，但就可以讓身邊既人從悲傷中撐過來。

我呢個過客，見過好多床邊既人，佢地既表現好多都唔一樣，你以為佢喊既，佢會笑俾你睇，你以為佢牛高馬大，看透世事咁既樣，偏偏係最未能接受現實嗰個，這一堆故事一直編寫那一堆故事，故事既感動不感動，又豈能簡單言明。

就係咁樣，過客未敢麻木胡混過去，愈清楚一點感覺，愈醒覺珍惜身邊既一切。

離家出走

當你一支箭"標"出門口，頭也不回咁落樓既時候，你知唔知道我有幾擔心你？你就係咁頑皮，硬要屋企人去承擔你闖出黎既禍。當時，我真係希望你會回頭望一望，然後知道自己已經玩大左，再乖乖咁行番上樓。

不過，你無咁做，我拖鞋都未著好，就跟住你跑出去。而你都無係樓下等我，反而唔知走左去邊，嗰一刻，我真係好茫然，係呢個人多車多既街道，搵你好似大海撈針一樣，唯有就扮成個傻佬一樣，周圍問人見唔見到一隻腰長腳短無尾短毛伸脷既狗仔。

無錯，我當時就係咁樣形容你，你都唔可以怪我咁話你，因為當你離開門口，走出呢個世途險惡的街道上，唔好期望有人會認識你、更加無人會好似我咁，覺得你係咁獨特，如果我唔係咁形容你，人地根本唔會留意你，唔同係屋企，路人只會眼尾望一望，好快將你歸類為流浪狗，然後匆匆地係你身邊略過，就算你好熱情咁錫其他人，佢地只會一腳伸走你。

好可惜，我咁樣講，佢地都係無視到你既存在，始終都講唔到你往哪個方向走，我原諒佢地，我明白只有屋企人先會知道自己既獨特之處，或者大家都係自己人，我憑住我既直覺，同埋你既惰性，我沿我地散步路線，配以邊走邊問既搜索方式，沿著一個方向，經過二條橫街，衝左三盞紅燈，終於係第四個路口，見到你半個蘿柚。

我向你大叫一聲，你就輕輕將你個烚熟狗頭轉過黎，然後以兔仔跳既跑姿撲回我既身邊，我就立即"秤"起你，向你隻兔仔耳怒叫，大大力咁拍打你個正在搖擺的無尾屁股，，一邊罵，一邊走回我們的家......而你就收起條招牌脷，乖乖咁躺在我的懷中，就好似搗蛋小鬼知道闖了禍，被老豆拖回家教訓咁既樣。

結果一如所料，你呢個闖左禍既小鬼，比老豆困左係一個陰暗既密室，與世隔絕幾個鐘....

事發到呢刻，我都無再睬你，話俾你知係搵到你嗰一刻，我心情會有幾咁複雜，驚你一下唔小心俾車撞親，怕你比道友用雞肉引誘誤入歧途，自甘墮落，後悔自己無好好咁看實你、教好你，當你願意聽我既時候，我無好好咁話你知，到放縱到連你個狗膽都大埋，闖埋禍，咁只會追悔莫及......

所以，嗰一刻我同自己講，呢一次會係你最後一次離家出走。

最近 ，做左一個好影響前途既決定，我選擇調去防止罪案科。

講真，究竟要留底或者繼續前線工作，我真係十五十六，

留底既話，雖然有更多時間讀書，但就會跟前線工作脫節，

如果繼續前線，我就無辦法兼顧其他工作，不過，係呢行就會得到更全面既了解。

所以，每個決定都有辣有唔辣，我考慮左好多日，終於澄清左自己既方向，決定要把握呢個機會，係時候準備造牌叫糊，阿謙，記住，堅持到底，唔好放棄。

過了呢個月，我地一齊已經三年。

很多謝你，無論係工作、學業、家庭，你都俾我好大支持，

話你知，每當我放工、放學既時候，都好期待見到你，有你係身邊，就算工作承受多大壓力，我都會提醒自己，我既生活係有所依靠，痛苦但令人回味。

你是珍貴的，這些日子令我深信，我們的感情是可以應付各式各樣的生活難題，見証這個無常的世代，更重要的是我們都樂意一起去面對。

看來，是時候開始準備組織我們的家庭了。我，非卿不娶。